प्रतिनिधी, धुळे : धुळे शहरासह परिसरात गेल्या काही दिवसांपासून जोरदार पाऊस सुरू आहे. तर काल सायंकाळी व रात्री देखील शहरात मुसळधार पाऊस झाला. त्यामुळे शहरातील देवपूरासह अनेक भागांमध्ये पाणीच पाणी झाले आहे. धुळे शहरातील अनेक रस्ते पाण्याखाली गेले आहेत. तर देवपुरातील लाला सरदार हायस्कूल जवळ असलेल्या सुशीनाला काठावरील अनेक घरांमध्ये पाणी शिरले आहे. त्यामुळे मोठे नुकसान झाले आहे. आज पहाटेच्या वेळी ही स्थिती निर्माण झाल्यामुळे नागरिकांची एकच तारांबळ उडाली होती. दरम्यान आता परिसरातील नागरिकांनी एकच गर्दी केली असून पोलीस बंदोबस्त ही तैनात करण्यात आला आहे. धुळे शहरातील वलावडी भागातील दैठणकन नगर येथे अनेक घर पाण्याखाली गेली आहेत. तसेच अनेक घरांची देखील पडझड होऊन मोठे नुकसान झाले आहे. हवामान विभागा कडून दिलेल्या अंदाजानुसार धुळ्यात रात्री मुसळधार पाऊस झाल्याने सर्वत्र जलमय अशी परिस्थिती झाल्याचे बघायला मिळत आहे. धुळे शहराचे आमदार डॉक्टर फारुख शाह तसेच भाजपाचे नगरसेवक नागसेन बोरसे यांनी देवपूर भागातील सुशीनाल्यावर असलेले अतिक्रमण जेसीबीच्या सहाय्याने काढण्यात आले. वलवाडी गावातील स्मशानभूमीपासून ते जिल्हा क्रीडा संकुल पर्यंत नाल्यामध्ये संस्थेला गाळ काढण्यात यावा यासाठी सामाजिक कार्यकर्त्यांनी धुळे मनपाकडे मागणी केली होती. धुळे महानगरपालिकेने याकडे दुर्लक्ष केल्यामुळे ही परिस्थिती निर्माण झाली आहे. त्यामुळे अनेक नागरिकांच्या घराची पडझड होऊन मोठ्या प्रमाणात नुकसान झाले आहे. धुळे महानगरपालिकेने वेळेवरच सामाजिक कार्यकर्त्यांनी केलेल्या मागणीकडे लक्ष दिले असते तर, आज ही परिस्थिती निर्माण झाली नसती. त्यामुळे पुढे मनपाने लवकरात लवकर वलवाडी स्मशानभूमी हे जिल्हा क्रीडा संकुल पर्यंतच्या नाल्याचे खोलीकरण करून काटेरी झुडपे काढण्यात यावी अशी मागणी आता सामाजिक कार्यकर्ते करीत आहे.
