प्रतिनिधी, बुलडाणा : अमरावती विभाग पदवीधर मतदारसंघाच्या दीर्घ काळ चाललेल्या मतमोजणी दरम्यान भाजपाने अवैध ठरलेल्या मतांची फेरमोजणी करण्याची मागणी केली. त्यावेळी मला प्रदेशाध्यक्ष नाना पटोले यांनी अधिकाऱ्यांवर दवाब असल्याचे सांगून कोणत्याही परिस्थितीत मतमोजणीचे टेबल सोडून जाऊ नका असा आदेश दिला. त्याचे पालन करून मी ही फेरमोजणी दहाच टेबलवर करण्याची मागणी केली आणि नंतर सर्वच सुरळीत पार पडले ,असा खळबळजनक गौप्यस्फोट नवनिर्वाचित आमदार धीरज लिंगाडे यांनी येथे केला..आज बुलढाणा शहरात आगमन झाल्यावर लिंगाडे यांची विजयी मिरवणूक काढण्यात आली.. यानंतर संध्याकाळी सात वाजेपर्यंत चाललेल्या सत्कार सोहळ्याच्या समारोपात मनोगत व्यक्त करताना आमदार लिंगाडे यांनी हा गौप्यस्फोट करून एकच खळबळ उडवून दिली.यावेळी माजी मंत्री तथा आमदार राजेंद्र शिंगणे यांची विशेष उपस्थिती होती. यावेळी व्यासपीठावर जिल्ह्यातील आघाडीचे नेते, पदाधिकारी बहुसंख्येने हजर होते. यावेळी लिंगाडे यांचा जंगी सत्कार करण्यात आला.
