प्रतिनिधी, ठाणे : शिवसेनेच्या पदाधिकाऱ्यांसह माजी नगरसेवकांचीही हजेरी
राज्याचे नगरविकास मंत्री एकनाथ शिंदे यांच्या बंडानंतर त्यांच्या समर्थनार्थ ठाणे जिल्ह्यात बॅनरबाजी सुरू झाली असतानाच, त्यापाठोपाठ आज (शनिवार) सायंकाळी शिंदे यांच्या लुईसवाडी निवासस्थानाबाहेर त्यांच्या समर्थकांनी मोठी गर्दी करत घोषणाबाजी देखील केली. समर्थकांच्या हातात बाळासाहेब ठाकरे आणि आनंद दिघे यांच्या पोस्टर्ससह शिवसेना नावाचा उल्लेख असलेले आणि धनुष्यबाणाची निशाणी असलेले झेंडे देखील होते. यावेळी एकनाथ शिंदे यांचे पुत्र आणि खासदार श्रीकांत शिंदे यांनी गाडीवर उभा राहून समर्थकांशी संवाद साधला.
लुईसवाडी परिसरात मोठा पोलीस बंदोबस्त तैनात केला होता आणि त्याच बरोबर सेवा रस्ते बंद केले होते. ठाण्यात जोरदार पाऊस सुरू झाला असून अशा परिस्थतीतही शिंदे समर्थक पावसात भिजून घोषणा देत होते. विविध भागातून शिंदे समर्थकांचे जथ्थे या ठिकाणी येत होते.
ठाण्यातील शिवसेनेचे अनेक माजी नगरसेवक आणि पदाधिकारी देखील या ठिकाणी उपस्थित होते. ठाण्याच्या माजी महापौर तसेच ठाणे जिल्हा महिला प्रमुख मिनाक्षी शिंदे यांची देखील त्याठिकाणी उपस्थिती होती.
